 |
| Alfonsu XII |
A finales
de 1874 un pronunciamientu militar propicia la vuelta del fiu y sucesor
llexítimu d’Isabel II: Alfonsu XII. Esti rei finó cola tercer Guerra Carlista y
algamó una tregua na de Cuba. Con ello y una notable estabilidá na política
española, l’Estáu Español respiraba un pocuñín de paz. Muerre nel añu 1885, a
los 28 años, de tuberculosis.
Al entamu del so reináu inda s’acuñaben
monedes de 2 pesetes cola matrona Hispania, la del Gobiernu provisional, y de 5 pesetes d’Amadéu I. A partir d’abril de 1875 aprobaríase, por Real Decretu,
l’acuñación de monedes cola efixe’l nuevu rei.
5.1 La primer moneda del rei (La
preconstitucional)
La primer
moneda foi de 5 pesetes. Detaca’l reversu col escudu hispánicu, el que se gababa nes monedes de so má. L’anversu
ye la efixe d’un rei de 17 años mirando a manzorga, diseñu del grabador de la
ceca Madrid, Gregorio Sellán.
Primer serie de monedes (1876-1881)
A partir
de la Promulgación de la Constitución de 1876, l’escudu de les pesetes pasa a
ser l’escudu d’armes diseñáu pola Real Academia de la Historia en 1868, esto
ye, que tornen les armes d’Aragón y Navarra, xunto al escudetu de los Borbón (tres
flores de lis) y la corona real. Los diseños son del grabador Gregorio Sellán. N’elles, aparez un rei con
un xeitu más mauru, a pesar de tener 18 años, y con una llixera variación no
referente al peñáu.
Los
primeros céntimos de cobre d’Alfonsu XII foron acuñaos en Barcelona pola firma
Oeschger, Mesdach y Cía., cuyes iniciales, OM, van grabaes nes monedes. Sedrán
les caberes monedes de cursu llegal acuñaes na ceca Barcelona, centralizándose
too ya dafechu na de Madrid. El rei mira a mandrecha, llau contrariu que nes d’oru
y plata. Tamién –y destaquen unes patilles incipientes que nun taben na efixe
grabada nes pesetes. L´escudu real va, cenciellamente, arrodiáu de lloréu.
La primer
peseta col escudu constitucional d’España acuñose en 1876. Nel anversu
troquelose’l bustu del rei diseñáu por Gregorio Sellán en 1875, pero con dalgún
retoque; esti bustu tamién s’entamó a acuñar nes monedes de 5 pesetes a partir
de 1877 xunto col escudu constitucional. Les monedes d’oru dexen de ser meres
acuñaciones de preba pa pasar a la circulación.
5.3 Segunda serie de monedes: El Patilles (1881-1887)
 |
| Alfonsu XII El Patilles |
En 1880
el Gobiernu aprobó un nuevu diseñu pa les monedes de Gregorio Sellán: un bustu
del rei, con 24 años, el cual ya apareciere nes monedes de 2 pesetes de 1879
(ya incluyía n’esta serie). Esta peseta ye conocía nel mundiu numismáticu col
nomatu de Patilles pola clara alusión
a les enormes patilles d’época que lluz el rei al estilu del emperador
austríacu Xicu Xosé, con cuya prima se casare’l soberanu español. El grabador
pudo tener un despiste y facer un perfil real con escesivu relieve, polo que la
patilla y el bigote sobresalíen per enriba del llistel (el borde), colo que la
pieza sufría un rápidu desgaste, aparte de que nun yera fácil apilales. Ye perraro atopar esta pieza nel mercáu numismáticu en flor de cuñu (FDC).
Na primer
serie nun s’acuñaren monedes de 50 céntimos, poro, la necesidá d’incluyir esti
valor pa la merca diaria, fexo que se suspendiera l’acuñación de monedes d’oru
hasta suplir esti fallu. Foron acuñaos na ceca Madrid.
Monedes d’ultramar (Islles Filipines)
Hasta 1877 nun s’ordenare a la
ceca de Manila el cese d’acuñar moneda baxo´l títulu d’Isabel II, poro, nes
islles siguieron llabrando moneda de la reina. Tres la orde, la ceca filipina
dexó de llaboriar y les sos monedes entamaron a acuñase na ceca de Madrid col
bustu del nuevu rei diseñáu por Gregorio Sellán en 1879 y unviaes en barcu
p’alló. Nel reversu aparez troqueláu l’escudu d’armes de la Monarquía Hispánica
y non el constitucional. La marca de ceca de les Islles Filipines yera una
estrella 5 puntes anepígrafa y asina foi respetao en Madird. Les primeres
acuñaciones daten del añu 1880. Tres la muerte del rei en 1885, sigueron
acuñándose monedes col so títulu hasta 1890, pero calteniendo el caberu añu
acuñáu: 1885.
Estes son les primeres llabres
ultramarines tres el nacimientu de la peseta, polo que sorprende que nun se
respetare el Decretu del 19 d’ochobre de 1868 nel que’l d’aquella MInistru de
Facienda D. Laureano Figuerola, dexaba bien claro que “En todos los dominios españoles la unidad monetaria será la peseta”.
.bmp)
No hay comentarios:
Publicar un comentario